考試恐懼症----空手道升級試

玩左半年空手道今日第一次考升級試, 本來都冇咩野特別點知一出場考官
就話要做20下掌上壓, 真係好唔高興, 之前上堂問左師傅好多次都話白帶
唔使做既嘛, 無端端又話要做, 一D心理準備都冇, 昨日仲同D花友行左5個
鐘頭山、放左2次狗、再游左1個鐘頭水再加上唔夠訓, 今日已經腳步浮浮
既喇......做完20下掌上壓手手腳腳開始唔受控制係咁震, 呼吸亂晒籠, 不嬲
都有既考試恐懼症又來喇, 自知受唔住考試既壓力所以任何需要考試既野
都唔想參與, 最近果次考試已經係拾幾年前考車牌, 好彩震左一次就搞掂...
今次係手震腳震既情況下總算完成左最易出錯果一部份......  點知最後果部
份個考官又玩野, 本來話係兩個白帶扎定個馬唔郁用平時學果D招式你一拳
我一拳咁玩既嘛...落場既竟然係黑帶, 咁都算反正著左件保護甲, 而且師傅一
向都話同黑帶打最安完, D黑帶識就住來打, 所以都好老定咁扎定個馬......誰
不知個女黑帶一出拳就打落來喉嚨度, 呆一呆之後火都來埋...雙腳開始唔受
控制好幾次想起腳, 個裁判係咁按住話係扎定個馬唔係上馬, 諗返轉頭當時
個場面一定好搞笑......下次再考升級試會係半年後, 如果而加問我仲考唔考
的話答案一定係否定...因為個鐘意玩野既考官即係我師傅......師傅你好野！！

******************************************************************

唔知大家對比人搣下巴或搣人下巴有咩看法呢？

今日有兩個好可愛既小師姐來睇考試, 分別係4歲同6歲, 當我考完試坐係個
姐姐隔離既時侯, 個姐姐突然伸出佢可愛既小手搣我個下巴: 你個下巴好尖
呀！ 我: 下...你搣我個下巴...咪真係好尖咩？  姐姐: 係呀, 真係好尖呀！！
自細就經常比人搣下巴, 比個咁可愛既細路女或同性搣下巴當然冇所謂喇,
不過換著係唔熟既異性其實都幾反感, 通常都會避開......   唔知大家對比人
搣下巴或搣人下巴有咩看法呢？