熱死貓

唔知點解貓貓咁鐘意毛毛床

仔仔出左院 (第四天)

25日, 今日仔仔返診所復診, 同埋睇驗血同驗尿報告, 其實血液抹片都睇到
中左牛蜱熱又已經開左葯既喇, 都仲要驗呢樣驗個樣, 報告講既嘛又係個d
咁既野......醫生話只要佢肯食野又冇嘔就得啦, 食埋個五日葯後再番去復診
同埋驗多次血睇下仲有冇虫係到.

仔仔今日精神左好多(冇咩心情同佢影相), 肯食乾糧, 不過會煮多幾日特餐
俾佢食. 餐單都係咁上下野, 唔會有咩變動, 今日上磅重左一公斤, 再重落去
葯既份量就唔夠既喇, 睇來餐單份量要減先得喇.

好唔開心係回程個的士司機行左條好多燈位既路, 搞到仔仔嘔左d葯出來,
d葯好貴嫁, 叫個醫生俾多少少都唔肯, 正衰司機睇少一陣都唔得!

岩岩同佢影左張相, 勁樣衰.

家庭新成員完結篇 (滿月)

原來家寶來左我到一個月咋, 唔知點解好似過左好耐咁.  佢d皮膚同腸胃
問題都係差唔多, 冇咩大改善.  同其他成員既相處就改善左, 家俊同家男
對佢冇咩野, 家男都冇再'fee'佢, 反而係家寶蝦家俊, 正一扮豬食老虎.

仔仔出左院 (第二天)-迴光反照?

23日, 仔仔今日冇周圍痾尿啦, 仲識得係廁所問口等我, 可能手仔冇咁痛啦,
間中仲會起身行下.  見到阿雪佢地出街又會扭要去, 所以佢都出左兩次街,
不過番到屋企氣促得好緊要.  下午佢好似記得番自己尋回犬既身份咁啊,
又開始埶野啦!

仔仔出左院 (第一天)

22日,今朝仔仔一起身就係廳痾左兩次尿, 痾第二次時因為企唔到直頭訓左係尿到, 佢從來都未試過咁樣.  早餐煮左六條雞柳加少許椰菜, 食晒, 唔肯飲水, 喂完葯之後順便灌左d水.午餐買左半斤豬肝加左d杞子、紅朿、紅莧菜煮湯, 飲湯食淨少少豬肝, 喂左一粒維他命B雜 (B1, B6, B12), 冇再灌水.  下午諗住買多d豬肝, 不過買唔到.  當我番屋企時仔仔又痾左兩次尿, 一次係佢張床上, 一次係地下, 又試訓左係尿到, 佢好似控制唔到自己咁, 因為仔仔怕行雷, 所以困佢係房開勁冷氣 (驚佢發燒). 晚餐一塊半西冷扒加少許紅莧菜煮湯, 食晒.  今日見佢d小便仲係黃色, 不過唔係可樂咁深色.

今晚放狗遇到做護士既狗友先知道原來仔仔隻手腫到好似豬蹄咁係唔正常嫁, 仲係會好痛好痛嫁, 原來吊盬水係輸落血管到, 而仔仔咁既情況係因為支針郁左, d職員由得佢變左輸落皮下層先會腫到好似豬蹄咁,  我問個醫生係咩正常既佢仲答我係, 真係好無良. 都唔知去邊到搵個好既獸醫. 今日見仔仔隻手唔肯放落地, 應該真係好痛......夜晚佢又試痾左一大篤尿係廳.......

仔仔食緊既係 Atovaquone,  每日三次, 每次2.3cc, 再加 Azithromycin, 每日一次, 每次6.6cc, 另外額外加維他命B雜 (B1, B6, B12), 每日三次, 每次一粒, 再加自製美食, 希望佢血紅素快d升番, 正常係 37-55, 仔仔入院個日得番 28.3 , 出院個日得番 24, 如果低過 20 就可能要輸血........

每次諗到因為自己疏忽而另到仔仔受咁多苦, 就覺得好內疚......

好多謝大家為仔仔加油同祝福!!